Policia e Shtetit, e udhëhequr nga Skënder Hita, ka informuar zyrtarisht Ministrinë e Arsimit mbi një rrezik në rritje që kërcënon nxënësit, i lidhur me një formë të re trafikimi dhe përdorimi të substancave psikoaktive.
Në një komunikim të dërguar institucioneve arsimore, policia shpreh shqetësimin për produktet e quajtura “Edibles”, të cilat, në dukje, duken si artikuj ushqimorë të zakonshëm, por përmbajnë nivele të larta të THC-së, përbërësin kryesor psikoaktiv të kanabisit.
Sipas informacionit nga autoritetet, këto produkte shpesh tregtohen në forma si xhelatina, karamele apo haribo, duke i bërë ato jashtëzakonisht tërheqëse dhe të vështira për t’u identifikuar nga fëmijët dhe adoleshentët.
Policia thekson se konsumimi i këtyre produkteve mund të sjellë pasoja të rënda për shëndetin, sidomos për të miturit, duke ndikuar negativisht në gjendjen e tyre psikologjike dhe fizike.
Me anë të këtij njoftimi, autoritetet i bëjnë thirrje drejtuesve të shkollave, mësuesve, prindërve dhe nxënësve që të tregojnë kujdes të shtuar dhe të angazhohen në rritjen e ndërdijes për rreziqet që sjellin këto produkte.
