Një ngjarje tragjike është regjistruar në zemër të Manhattan-it, ku një grua me origjinë shqiptare humbi jetën pasi ra në një pusetë mirëmbajtjeje të lënë të hapur në zonën e Fifth Avenue.
Viktima është identifikuar si Donika Gocaj, 56 vjeçe, banuese në Briarcliff Manor, New York. Sipas policisë amerikane, ajo u gjet pa ndjenja në fund të pusetës, rreth tre metra e thellë, pak para mesnatës së të hënës. Pavarësisht transportimit urgjent në spital, mjekët konfirmuan se ajo nuk mundi të mbijetonte.
Dëshmitarë në vendngjarje thanë se dëgjuan britma për ndihmë, ndërsa gruaja përsëriste: “Po vdes”.
Ndërkohë, kompania energjetike Con Edison deklaroi se nga verifikimi i kamerave të sigurisë dyshohet se kapaku i pusetës ishte zhvendosur nga një kamion vetëm pak minuta para incidentit fatal.
“Rreth 12 minuta më vonë, personi i përfshirë në incident parkoi automjetin pranë zonës”, tha një zëdhënës i kompanisë për CBS.
Sipas kompanisë, raste të tilla janë të rralla, por automjetet e rënda mund të lëvizin kapakët e puseteve.
Familjarët e 56-vjeçares shprehën tronditjen për tragjedinë, duke thënë se është e paimagjinueshme që një ngjarje e tillë të ndodhë në një nga zonat më të frekuentuara dhe më të vizituara të New York-ut.
