Një situatë emergjente ndodhi në një fluturim të Air Canada, kur një nga pilotët pësoi një krizë epileptike gjatë fluturimit, duke shkaktuar panik në bordin e avionit.
Ngjarja ndodhi në fluturimin AC7664, i cili ishte duke udhëtuar nga Newark, New Jersey, drejt Nova Scotia në Kanada. Sipas raportimeve nga mediat amerikane, fluturimi po zhvillohej normalisht deri në momentin kur avioni filloi të sillte lëvizje të pazakonta, duke shkaktuar shqetësim mes pasagjerëve dhe ekuipazhit.
Një pasagjer i tha ABC News se pa stjuardët që vraponin me ngut drejt kabinës së pilotëve. Pak minuta më vonë, ata dolën me njëri prej pilotëve që ishte duke përjetuar krizën epileptike.
Një dëshmitar tha se katër pasagjerë ofruan ndihmë për të mbajtur pilotin nën kontroll, ndërsa ai ndodhej në një gjendje të rënduar. “Për rreth 40 minuta u përpoqëm ta mbanim dhe ta qetësonim. Ishte një situatë vërtet e frikshme”, shpjegoi ai, duke sqaruar se ishin përdorur edhe rripa sigurie për të imobilizuar krahët dhe këmbët e pilotit.
Ndërkohë, oficeri i parë mori menjëherë kontrollin e avionit dhe kërkoi një ulje emergjente në Aeroportin Ndërkombëtar të Bostonit. Avioni u ul me sukses, dhe të 61 pasagjerët në bord dolën pa dëm të shkaktuar.
Raportohet se piloti kishte humbur ndjenjat për shumicën e incidentit dhe filloi të rikuperohej vetëm pas uljes së avionit.
Një tjetër pasagjer përshkroi se momentet e tensionit shkaktuan frikë të madhe mes udhëtarëve. Ai tha se fëmijët e tij filluan të luteshin gjatë fluturimit dhe shprehu mirënjohjen që ngjarja përfundoi pa pasoja fatale.
Pasi avioni u ul, piloti u transportua nga ekipet e emergjencës në Spitalin e Përgjithshëm të Massachusetts, ku po merr trajtimin e nevojshëm mjekësor.
