Një zjarr masiv përfshiu pasditen e 14 gushtit zonën e fshatit Paulesh, në Njësinë Administrative Pajovë të Bashkisë Peqin, duke u shtrirë deri në zonën Paulesh–Vidhasasgjel, në fshatin Vidhasasgjel.
Flakët shpërthyen rreth orës 15:00 dhe mbetën aktive deri në orën 17:50, kur u arrit të kontrolloheshin falë ndërhyrjes së zjarrfikësve nga bashkitë Elbasan, Cërrik, Belsh dhe Rrogozhinë.
Sipas informacionit të shërbimit zjarrfikës, zjarri preku një sipërfaqe prej afro 3 hektarësh me ullishte, pyll, ferra dhe barishte të egra. Më shumë se 2 hektarë, kryesisht me ullinj dhe barishte, u dogjën nga flakët.
Shuarja e zjarrit mobilizoi 22 zjarrfikës në terren, të cilëve iu bashkuan edhe 4 efektivë policie. Për të frenuar përhapjen e flakëve ndihmuan edhe banorë të zonës.
Forcat zjarrfikëse nga Elbasani, Cërriku, Belshi dhe Rrogozhina u kërkuan për mbështetje, duke kontribuar në izolimin e vatrave të zjarrit dhe në frenimin e përhapjes së tij.
Hetimet e para tregojnë se “shkaku i zjarrit dyshohet të jetë i qëllimshëm”. Deri në përfundim të operacionit, autoritetet nuk kanë njoftuar për ndalime të personave të dyshuar.
Nuk është raportuar për persona të lënduar dhe ndërhyrja e urgjencës mjekësore nuk ka qenë e nevojshme.
Autoritetet do të vijojnë verifikimet për të përcaktuar plotësisht rrethanat dhe përgjegjësitë lidhur me këtë zjarr.
