Organizata Botërore e Shëndetësisë (OBSH) ka bërë thirrje për forcimin e masave mbrojtëse në Evropë për të përballuar valët e të nxehtit, duke theksuar se mbi 200,000 njerëz kanë humbur jetën për shkak të kushteve ekstreme të temperaturës në katër vitet e fundit. Sipas OBSH-së, shumica e këtyre vdekjeve mund të ishin parandaluar nëpërmjet politikave dhe planeve efektive të mbrojtjes.
Drejtori Rajonal i OBSH-së për Evropën, Hans Henri P. Kluge, e përshkroi nxehtësinë ekstreme si një nga pasojat më të menjëhershme dhe fatale të ndryshimeve klimatike. Ai theksoi se valët e të nxehtit tashmë nuk janë më ngjarje të shkurtra, por përbëjnë një krizë të përsëritur që po ushtrojnë presion mbi sistemet shëndetësore dhe infrastrukturën e vendeve.
OBSH u ka bërë apel qeverive që të zhvillojnë dhe implementojnë plane veprimi për të përballuar të nxehtin. Kjo përfshin krijimin e qendrave të freskimit, rritjen e hapësirave të gjelbra në zona urbane, mbrojtjen e grupeve të moshuara dhe të tjerëve të cenueshëm, si dhe përshtatjen e orareve të punës gjatë ditëve me temperaturë të lartë.
Sipas vlerësimeve të organizatës, Evropa po ngrohet me ritme më të shpejta se shumica e rajoneve të tjera në botë. Plakja e popullsisë, urbanizimi dhe rritja e temperaturave po kontribuojnë në rritjen e rrezikut për sëmundje dhe vdekje të lidhura me të nxehtin.
OBSH ka vendosur një qëllim ambicioz: arritjen e zero vdekjeve të lidhura me temperaturat ekstreme, përmes masave parandaluese dhe një bashkëpunimi të fortë mes institucioneve në të gjitha nivelet.
