Mbrojtësi i Kombëtares shqiptare është shfaqur në stërvitje me Vllazninë, duke mbajtur formën fizike ndërsa pret të vendosë për të ardhmen e tij, e cila pritet të jetë sërish në futbollin italian.
Fotoja është realizuar në Qendrën Sportive “Hasa”, në Golem të Shkodrës, ku Hysaj shihet përkrah një tjetër legjende, kësaj radhe të tifozërisë shkodrane, Bardhok Kolës.
Aktualisht pa skuadër, pas përfundimit të kontratës me Lazion, Hysaj po stërvitet në ambientet e Vllaznisë, klubit ku hodhi hapat e parë në futboll përpara se të transferohej në akademinë e Empolit.
Gjatë karrierës së tij 15-vjeçare, shkodrani ka luajtur vetëm në elitën e futbollit italian, duke veshur fanellat e Empolit, Napolit dhe Lazios. Ai numëron mbi 300 paraqitje në Serie A dhe mbetet një nga futbollistët shqiptarë më të suksesshëm që ka luajtur në kampionatin italian.
