Agim Bubeqi, një prej emrave të dalluar të Flamurtarit të Vlorës në vitet ‘80, është ndarë nga jeta duke lënë pas një trashëgimi të rëndësishme në futbollin shqiptar. Kjo periudhë u konsiderua ndër më të artat për skuadrën vlonjate.
I lindur më 7 prill 1963, Bubeqi i kushtoi gjithë karrierën e tij profesioniste Flamurtarit, duke mbajtur rolin e sulmuesit. Gjithashtu, ai u grumbullua me Kombëtaren shqiptare, ku regjistroi 6 paraqitje.
Trupi i tij u gjet pa shenja jete në banesën ku jetonte. Hetimet paraprake sugjerojnë se Bubeqi kishte ndërruar jetë disa ditë përpara se të zbulohej. Ishin fqinjët që, pasi vunë re mungesën e tij, lajmëruan Policinë.
Bubeqi i përkiste një brezi që e bëri Flamurtarin një prej skuadrave më të fuqishme të viteve ‘80, duke u afirmuar edhe në garat europiane dhe duke mbetur në kujtesën e sportdashësve për paraqitjet e tij të shkëlqyera.
Informohet se prej vitesh ish-futbollisti përballej me vështirësi të shëndetit mendor.
Humbja e tij ka pikëlluar komunitetin sportiv të Vlorës, si dhe të gjithë ata që e njohën apo e ndoqën në kohët e lavdisë së Flamurtarit.
