Myftinia Shkodër zhvilloi këtë të hënë ceremoninë e përcjelljes së haxhilerëve të Shkodrës për vitin 1447 Hixhri / 2026.
Aktiviteti u mbajt në xhaminë e Parrucës, ku para faljes së namazit të mesditës, myftiu i Shkodrës, Imam Muhamed B. Sytari, zhvilloi një lutje për besimtarët që do të nisen drejt vendeve të shenjta.
Gjatë një deklarate për mediat, myftiu Sytari u shpreh se përcjellja e haxhilerëve është një traditë e hershme e komunitetit mysliman në Shkodër dhe vlerësoi pjesëmarrjen e besimtarëve shqiptarë në Haxh.
Sipas njoftimit të Myftinisë Shkodër, këtë vit nga Shkodra do të udhëtojnë 40 besimtarë, të cilët do të nisen nga aeroporti i Podgoricës drejt Xhidahut dhe më pas në Mekë për kryerjen e ritualeve të Haxhit.
Në ceremoni morën pjesë familjarë, miq dhe besimtarë të shumtë, të cilët uruan haxhilerët për një udhëtim të mbarë.
