Një shtëpi dykatëshe në zonën e Fier-Sheganit u përfshi nga zjarri këtë të hënë pasdite, ku banonin një çift të moshuarish.
Shpërthimi i flakëve filloi në katin e parë të banesës. Menjëherë sapo u vunë re, familjarët njoftuan shërbimin zjarrfikës. Banorë të lagjes dhe të afërm ndërhynë me shpejtësi, duke ndihmuar të moshuarit të dilnin të padëmtuar nga banesa.
Dy automjete të zjarrfikëses nga Lushnja mbërritën në vendngjarje, duke arritur të izolonin flakët dhe të shmangnin përhapjen e zjarrit në shtëpitë përreth.
Situata u stabilizua pas ndërhyrjes së shpejtë të forcave zjarrfikëse, ndërkohë një ambulancë u dërgua për të kryer kontrollin shëndetësor të çiftit të moshuar.
Zjarrfikësit e Lushnjës raportojnë se dyshohet për një shkëndijë elektrike si burimi i zjarrit. Hetimet për të saktësuar shkaqet e incidentit janë ende në vijim.
