Analisti Mentor Kikia, në komentet e tij mbi protestat që po zhvillohen kundër Edi Ramës, theksoi se qëllimi themelor i këtyre revoltave qytetare duhet të jetë transformimi i qeverisjes aktuale.
Gjatë një interviste, ai vazhdoi të shprehte se pas krijimit të një qeverie tranzitore, kjo e fundit ka për detyrë të sigurojë zgjedhje të parakohshme që garantojnë kushte të barabarta për të gjitha partitë politike.
Kikia theksoi nevojën për një reformë të thellë zgjedhore nga ana e qeverisë tranzitore, një reformë që do të çlirojë votën nga ndikimet e pushtetit, do të ndalojë shfrytëzimin e administratës publike gjatë fushatave zgjedhore dhe do të sigurojë transparencë financiare për partitë.
Ai theksoi se vetëm pas implementimit të këtyre ndryshimeve, vota e lirë e qytetarëve do të ketë fuqinë të vendosë se kush do të udhëheqë vendin.
“Kjo protestë duhet të trajtojë vetëm një çështje: ndryshimin e qeverisjes. Qeveria tranzitore duhet të garantojë një proces zgjedhor të parakohshëm me rregulla loje të barabarta.
Gjithashtu, duhet të hartohet një ligj zgjedhor që të çlirojë votën nga ndikimi i partisë në pushtet, duke eliminuar përdorimin e administratës publike në procesin zgjedhor dhe duke siguruar transparencën financiare të partive, për të parandaluar futjen e fondeve kriminale në makineritë elektorale.
Po ashtu, është e domosdoshme të realizohet një reformë e thellë zgjedhore, e cila do t’i japë mundësinë votës së lirë të vendosë se kush do të jetë kryeministër. Nëse kjo qeveri nuk është në përputhje me dëshirat e qytetarëve, ajo duhet të largohet përmes zgjedhjeve të parakohshme,” përfundoi Kikia.
