Në një vendim të miratuar nga qeveria, Bashkia e Malësisë së Madhe ka marrë statusin e zonës me përparësi për zhvillimin e ekonomisë malore, si pjesë e implementimit të ligjit “Për paketën e maleve”.
Vendimi, i nënshkruar nga Kryeministri Edi Rama, identifikon 10 zona prioritare në Malësinë e Madhe, duke mbuluar një sipërfaqe totale prej rreth 51,586 hektarësh, ku do të inkurajohen investimet dhe zhvillimi ekonomik.
Zona e parë deri në të tetën përfshin fshatrat Rapshë, Brojë, Kastrat, Bratosh, Vrith, Vajush, Reç dhe Rrepisht, të cilat së bashku shtrihen në 19,203 hektarë.
Zona e nëntë përfshin qytetin e Koplik dhe fshatrat Kamicë-Flakë, Stërbeq, Jubicë, Kalldrun, Dobër, Ktosh, Gjormë, Omaraj, Grilë dhe Boriç i Madh, që shtrihen në 2,769 hektarë.
Po ashtu, zona e dhjetë përfshin destinacionet alpine Vermosh, Lëpushë, Vukël, Nikç dhe Bogë, pjesë e njësive administrative Kelmend dhe Shkrel, me sipërfaqen më të madhe prej 29,614 hektarësh.
Sipas këtij vendimi, në këto territore do të promovohen aktivitete të zhvillimit ekonomik, industrial dhe turistik, me qëllimin për të nxitur investimet dhe për të rigjallëruar ekonominë lokale në zonat malore të Malësisë së Madhe.
