Besimtarët myslimanë në qytetin e Lezhës i janë bashkuar sot festimeve të Kurban Bajramit, një prej festave më të rëndësishme të besimit islam. Qindra besimtarë morën pjesë në faljen e namazit të Bajramit, duke shkëmbyer urime për paqe, begati dhe mirësi në familjet e tyre.
Në mesazhin drejtuar komunitetit, Myftiu i Lezhës, Sadetin Kotrri, u ndal te domethënia shpirtërore e kësaj dite të shenjtë. Ai kujtoi sakrificën dhe bindjen e Profetit Ibrahim dhe djalit të tij, Ismailit, duke theksuar se Kurban Bajrami nuk simbolizon vetëm ritualin e kurbanit, por mbi të gjitha sakrificën, besimin dhe solidaritetin mes njerëzve.
Sipas tij, kjo festë është një thirrje për më shumë mirëkuptim, bashkim dhe respekt ndaj njëri-tjetrit, duke ruajtur harmoninë fetare dhe vlerat njerëzore që karakterizojnë qytetin e Lezhës.
