Kuvendi i Shqipërisë mblidhet sot në seancë plenare me një rend dite që përfshin disa projektligje dhe interpelanca, ndërsa një nga çështjet kryesore që pritet të marrë vëmendje është projektligji për ndryshimin e ligjit “Për statusin e gjyqtarëve dhe prokurorëve në Republikën e Shqipërisë”.
Projektligji, i renditur në pikën 11 të rendit të ditës, parashikon “disa shtesa dhe ndryshime” në ligjin nr. 96/2016, të ndryshuar. Për miratimin e tij kërkohet shumicë e cilësuar votash.
Për projektligjin do të zhvillohen pyetje, do të shprehet nismëtari dhe Komisioni për Çështjet Ligjore dhe Administratën Publike, ndërsa mendim do të japin edhe Komisioni për Ekonominë, Punësimin dhe Financat dhe Komisioni për të Drejtat e Njeriut dhe Mjetet e Informimit Publik. Në përfundim do të zhvillohen diskutimet e grupeve parlamentare dhe më pas votimi.
Ndryshimet në ligjin nr. 96/2016 lidhen me kuadrin ligjor që rregullon statusin e gjyqtarëve dhe prokurorëve, përfshirë elemente të sistemit të pagave të magjistratëve.
Interpelanca urgjente me pesë ministra
Përpara votimit të projektligjeve, seanca do të nisë me miratimin e procesverbalit të seancës së 8 shtatorit dhe njoftimet.
Në vijim janë parashikuar 5 interpelanca urgjente të kërkuara nga një grup deputetësh të Grupit Parlamentar të Partisë Demokratike.
Deputetët do të kërkojnë përgjigje nga:
- Ministri i Mjedisit, Sofjan Jaupaj;
- Ministri i Punëve të Brendshme;
- Ministrja e Arsimit, Mirela Kumbaro;
- Ministrja e Shëndetësisë dhe Mirëqenies Sociale, Klodiana Spahiu.
- Ministri i Infrastrukturës dhe Energjisë, Enea Karakaçi.
Ministri i Mjedisit, Sofjan Jaupaj;
Ministri i Punëve të Brendshme;
Ministrja e Arsimit, Mirela Kumbaro;
Ministrja e Shëndetësisë dhe Mirëqenies Sociale, Klodiana Spahiu.
Konventa ndërkombëtare dhe projektligje të tjera
Pas interpelancave, Kuvendi pritet të shqyrtojë ratifikimin e Konventës për Themelimin e Komisionit Ndërkombëtar të Kërkesave për Ukrainën, si dhe pranimin e Konventës kuadër të Këshillit të Evropës për Inteligjencën Artificiale, të Drejtat e Njeriut, Demokracinë dhe Shtetin e së Drejtës.
Në rend dite është edhe një projektligj që lidhet me ndryshimin e Marrëveshjes Ndërkombëtare për Vajin e Ullirit dhe Ullinjtë e Tavolinës.
Pas projektligjit për statusin e gjyqtarëve dhe prokurorëve, deputetët do të shqyrtojnë edhe projektligjin “Për disenjot” dhe ndryshimet në ligjin për marrjen në kontroll të shoqërive me ofertë publike.
Seanca do të vijojë me votimin e tre projektvendimeve për ndryshime në kryesitë, anëtarësinë dhe anëtarët zëvendësues të komisioneve të përhershme të Kuvendit.
Në fund të seancës janë parashikuar diskutime për çështje jashtë rendit të ditës, me një kohë totale jo më shumë se 60 minuta.
