Kryetari i Komuniteti Mysliman i Shqipërisë ka uruar besimtarët myslimanë dhe gjithë shqiptarët me rastin e festës së Kurban Bajramit, duke përcjellë mesazhe paqeje, harmonie, solidariteti dhe afrimi me Zotin.
Në mesazhin e tij drejtuar besimtarëve në Bulevardin “Dëshmorët e Kombit”, ku qindra mijëra besimtarë morën pjesë në faljen e namazit, ai e cilësoi Kurban Bajramin si një nga ditët më të bekuara për myslimanët, një festë që simbolizon sakrificën, devotshmërinë dhe dashurinë ndaj Zotit, duke sjellë në vëmendje shembullin e Profetit Ibrahim (a.s.) dhe besimin e tij të palëkundur.
“Kurban është festa e zemrës së pastër. Është festa që na mëson të largohemi nga egoizmi, nga urrejtja, nga padrejtësia dhe indiferenca ndaj njëri-tjetrit”, u shpreh ai.
Kreu i KMSH-së theksoi gjithashtu rëndësinë e solidaritetit njerëzor dhe kujdesit ndaj shtresave në nevojë, duke apeluar që gjatë kësaj feste të mos harrohen të varfrit, të moshuarit, jetimët dhe njerëzit që përballen me vështirësi ekonomike apo shëndetësore.
“Vlera e kësaj feste nuk matet me atë që kemi në tryezë, por me atë që kemi në zemër”, theksoi ai, ndërsa nënvizoi se një vizitë tek prindërit, një fjalë e mirë apo një dorë e shtrirë për nevojtarët janë vlera që forcojnë shoqërinë dhe lidhjet njerëzore.
Në mesazhin e tij, ai ndaloi edhe tek rëndësia e harmonisë fetare në Shqipëri, duke e cilësuar atë si një pasuri të rrallë kombëtare që duhet ruajtur me krenari.
“Në këtë vend, kambanat dhe ezani kanë jetuar pranë njëri-tjetrit si zëra paqeje. Kjo është kulturë, qytetërim dhe amaneti i të parëve tanë”, u shpreh ai.
Kryetari i KMSH-së foli edhe për sfidat me të cilat përballet bota sot, si luftërat, varfëria dhe kriza shpirtërore, duke theksuar se besimtari duhet të mbetet gjithmonë njeri i shpresës, i paqes dhe i mirësisë.
Në përfundim të mesazhit të tij, ai uroi që Kurban Bajrami të sjellë më shumë dashuri, mirësi dhe besim tek Zoti, ndërsa përcolli një urim të veçantë edhe për haxhinjtë shqiptarë që ndodhen në Mekë dhe Medinë për kryerjen e Haxhit.
“Gëzuar Kurban Bajramin! Paqja, mëshira dhe begatia e Allahut qofshin mbi ju dhe mbi familjet tuaja”, përfundoi urimi i tij.
