Policia kroate ka ndaluar shtetasin ukrainas Vladimir Z., i cili dyshohet për përfshirje në shpërthimet që dëmtuan gazsjellësin Nord Stream ndërmjet Rusisë dhe Gjermanisë në vitin 2022, njoftoi më 19 gusht Prokuroria Federale e Gjermanisë.
Ndërhyrja u krye në qytetin Pula, në veriperëndim të Kroacisë, në bazë të një urdhër-arresti europian të lëshuar nga Gjykata Federale Supreme e Gjermanisë në qershor 2024.
Drejtoria Policore e Qarkut të Istrias bëri të ditur për Radio Evropa e Lirë (REL) se ndalimi u realizua të mërkurën në mëngjes në një kompleks turistik, por shtoi se ende po verifikohet nëse bëhet fjalë për të njëjtin person, për të cilin ekziston një urdhër-arrest europian nga Gjykata Federale e Drejtësisë në Karlsruhe.
“Në këtë moment nuk jemi në gjendje të konfirmojmë identitetin e personit të arrestuar”, deklaroi Drejtoria e Policisë së Istrias në një përgjigje të dhënë me shkrim.
Sipas informacioneve të Prokurorisë Federale të Gjermanisë, Vladimir Z., një zhytës i kualifikuar, ishte pjesë e një grupi të udhëhequr nga shtetasi ukrainas Serhiy K., ndaj të cilit po zhvillohet një hetim i veçantë. Ky i fundit u dyshua se në shtator të vitit 2022 instaloi pajisje shpërthyese në gazsjellësin Nord Stream 1 dhe Nord Stream 2 pranë ishullit Bornholm. Pajisjet shpërthyese u aktivizuan më 26 shtator të atij viti, duke sjellë dëmtim të rëndë në të dy gazsjellësit.
“I dyshuari mori pjesë në zhytjet me bombola të nevojshme për realizimin e operacionit. Ai dhe bashkëpunëtorët e tij përdorën një varkë me vela që lundroi nga Rostoku për transport. Jahti ishte marrë më parë me qira nga një kompani gjermane përmes një ndërmjetësi, duke përdorur dokumente personale të falsifikuara”, tha prokuroria.
Pritet që pas ekstradimit, i dyshuari të paraqitet përpara një gjyqtari hetues të Gjykatës Federale Supreme.
Prokuroria Federale ka ngritur aktakuzë ndaj Serhiy K. në Gjykatën e Lartë Rajonale Hanseatike në Hamburg, në fund të qershorit 2026. Serhiy K. ishte arrestuar në gusht të vitit 2025 në Itali.
Hetimet e autoriteteve gjermane kanë identifikuar si të dyshuar kryesorë një grup ukrainas prej pesë burrash dhe një gruaje të përfshirë në shpërthimet në gazsjellës.
Menjëherë pas shpërthimit në Nord Stream, vendet perëndimore akuzuan Rusinë, e cila në atë kohë ishte nën sanksione për shkak të luftës në Ukrainë.
Moska, në anën tjetër, e hodhi fajin drejt Ukrainës.
Presidenti ukrainas, Volodymyr Zelensky, deklaroi se qeveria e tij nuk kishte asnjë dijeni për ndonjë plan të mundshëm për shkatërrimin e Nord Stream.
Gazsjellësi Nord Stream është shndërruar prej vitesh në një çështje të debatueshme, pasi i lejonte gazit rus të anashkalonte rrugët tradicionale të tranzitit nëpër Evropën Lindore, duke e bërë Gjermaninë të varur nga gazi rus me kosto të ulët.
