Presidenti i Vllaznisë, Alban Xhaferri, ka bërë një deklaratë publike në rrjetet sociale këtë të premte, duke shfaqur solidaritetin e tij me ish-drejtuesit e UÇK-së, të cilët u dënuan me gjithsej 81 vite burg. Në mesazhin e tij, Xhaferri theksoi mbështetjen për ata që, sipas tij, “Gjykata e Hagës është për turp”.
Mirëpo postimi i tij mori një kthesë të papritur, kur një tifoz i klubit vuri theksin tek performanca aktuale e Vllaznisë, duke adresuar komente të rënda në drejtim të presidentit. Ky tifoz akuzoi Xhaferrin për shitje të ndeshjeve dhe përgjegjësi për vendosjen e Vllaznisë në fund të tabelës pas katër javësh në Superligë.
“O mos fol për turpin e Hagës, por fol për turpin që po i bën Vllaznisë duke shitur ndeshje dhe duke e vendosur aty ku nuk e meriton ky emër. Ose merru me politikë sepse nuk na duhet neve politika, por Vllaznia,”- shkruhet në koment.
Presidenti Xhaferri nuk e la pa përgjigje këtë akuzë, duke ia kthyer tifozit me fjalët:
“Nëse ke prova dhe argumente të tilla shko në prokurori. Në të kundërt je një kokërr shpifësit dhe mashtruesit,”-replikon Xhaferri.
Gjatë merkatos së verës, Vllaznia përjetoi ndryshime të theksuara në përbërje, ndërkohë që në ndeshjen e fundit u mund 2-1 nga Laçi.
