Të premten në mbrëmje, udhëtarët që kalojnë nga Greqia drejt Shqipërisë në pikën kufitare të Kakavijes janë detyruar të përballen me pritje të gjata në territorin grek.
Kolona e makinave që presin në sportelet e doganës greke është shtrirë për rreth 5 kilometra. Qindra persona që udhëtojnë drejt Shqipërisë kanë mbetur në pritje të gjatë, kryesisht për shkak të ritmit të ngadalshëm me të cilin po kryhet kontrolli i dokumenteve nga pala greke.
Burime pranë kufirit bëjnë të ditur se, pavarësisht fluksit të madh të udhëtarëve, autoritetet greke po punojnë vetëm me një ose dy sportele, çka ka sjellë zgjatje të mëtejshme të pritjes. Në këtë periudhë të muajit gusht, lëvizjet ditore në të dy drejtimet përmes doganës së Kakavijes shkojnë mesatarisht në 9 mijë persona.
