Amnesty International, një organizatë ndërkombëtare e të drejtave të njeriut, ka akuzuar Izraelin për zbatimin e një politike sistematike të spastrimit etnik ndaj komuniteteve beduine dhe baritore palestineze në Zonën C të Bregut Perëndimor të okupuar.
Në raportin e saj të fundit, të titulluar “Fshirja e çdo gjurme palestineze: spastrimi etnik izraelit i komuniteteve beduine dhe baritore”, organizata pohon se autoritetet izraelite po përdorin transferimin e detyruar të popullsisë si një mjet për të rritur kontrollin mbi territorin dhe për të intensifikuar aneksimin e Bregut Perëndimor.
Siç theksohet në raport, toka e palestinezëve në Zonën C po u hiqet fillimisht përmes riklasifikimit në kategoritë e “tokës shtetërore”, zonave ushtarake, rezervave natyrore, apo sitëve arkeologjike. Pas kësaj, në këto territore ndërmerren shembje objektesh, kufizime të lëvizjes dhe zgjerime të vendbanimeve izraelite, të cilat gradualisht ngushtojnë hapësirën e jetesës për komunitetet palestineze.
Amnesty International nënvizon se këto veprime nuk janë thjesht raste izoluara ose pasojë e veprimeve individuale të kolonëve, por janë pjesë e një politike të mbështetur nga shteti. Agnès Callamard, Sekretarja e Përgjithshme e organizatës, e përshkroi dhunën e kolonëve si një element të rëndësishëm të asaj që ajo cilëson si një fushatë më të gjerë spastrimi etnik dhe të “sistemit izraelit të aparteidit”.
Raporti gjithashtu ofron të dhëna për zgjerimin e vendbanimeve izraelite. Gjatë tre viteve të para të mandatit të Benjamin Netanyahu, buxheti i Ministrisë së Vendbanimeve është rritur me 122 për qind. Ndërkohë, nga viti 2023 deri në vitin 2025, qeveria izraelite ka ndihmuar në promovimin e projekteve për ndërtimin e 50.785 njësive të reja banimi në vendbanimet hebraike. Vetëm për vitin 2025 janë miratuar 27.941 njësi, duke vendosur një rekord vjetor sipas organizatës.
Gjatë së njëjtës periudhë, autoritetet izraelite kanë miratuar prishjen e 3.407 banesave dhe strukturave palestineze në Zonën C, duke detyruar zhvendosjen e 2.996 personave, sipas raportit të Amnesty International.
