Përkeqësimi i kushteve të motit që ka përfshirë Italinë së fundmi ka rezultuar në humbjen e jetës së dy grave.
Një nga viktimat humbi jetën këtë mëngjes në rajonin e Friulit, në verilindje të vendit, pasi u përmbyt në një kalim rrugor ku kishte hyrë me automjetin e saj.
Ndërkaq, në rajonin e Toskanës ndodhi një tjetër tragjedi. Një grua humbi jetën në apartamentin e saj kur një tornado goditi zonën. Teksa përpiqej të mbyllte një dritare, xhami u thye nga forca e erës, duke e plagosur për vdekje në qafë.
Stuhia ka shkaktuar edhe dëme materiale të konsiderueshme. Në Romë, dhjetëra automjete u dëmtuan për shkak të rrëzimit të pemëve, ndërsa reshjet intensive sollën përmbytjen e dy stacioneve qendrore të metrosë.
Edhe qyteti i Astit, në rajonin veriperëndimor të Piemontes, është goditur rëndë nga moti i keq. Zjarrfikësit kanë marrë rreth 70 thirrje për ndihmë dhe janë angazhuar në evakuimin e banorëve të kateve përdhese dhe në asistencën për pronarët e dyqaneve.
Sipas parashikimeve, pas mesnate pritet që situata të fillojë të stabilizohet dhe që moti të përmirësohet në të gjithë vendin.
