Deputetja e Partisë Socialiste, Iris Luarasi, ka reaguar lidhur me debatet dhe protestat për projektin në zonën e Zvërnecit, duke ngritur pikëpyetje mbi mënyrën se si shpërndahen informacionet në rrjet dhe reagimet që ato shkaktojnë.
Ajo thekson se indinjata publike është e kuptueshme kur bëhet fjalë për mjedisin, por apelon që çdo informacion të verifikohet përpara se të nxirren përfundime, duke paralajmëruar për rrezikun e “montazheve” dhe keqinformimit.
Reagimi i plotë
Kush përfiton kur Shqipëria ndalon? Kur ndalon investimi, kur ikën Aman, kur tërhiqet Rosewood, kur Mandarin Oriental zgjedh fqinjin tonë? Kush feston pas kësaj?
Dje pashë në shesh njerëz që i njoh. Njerëz që i respektoj. Njerëz që kanë zemër të mirë.
E kuptoj indinjatën. Sepse kur shikon një ekskavator pranë një lagune me pelikanë, zemra reagon para mendjes dh kjo është njerëzore. Por pas reagimit të zemrës, vjen përgjegjësia e mendjes.
Dhe mendja na pyet: a ishte ajo video reale, apo një montazh i bërë në një studio jashtë Shqipërisë?
Pas çdo informacioni që ju indinjoi, kërkoni dokumentin origjinal. Nëse ai që ju indinjoi nuk ju jep dokumentin, pyetni veten pse.
Kjo nuk është luftë mes nesh. Është luftë mes asaj që na thuhet dhe asaj që është e vërtetë.
