Një aksident i rëndë me pasojë vdekjen është regjistruar mbrëmjen e kësaj të premteje në aksin rrugor Lezhë–Rrilë, pranë kryqëzimit të Superstradës.
Sipas informacionit paraprak të Policisë, ngjarja ka ndodhur rreth orës 21:10, kur një automjet me drejtues shtetasin M. P., 23 vjeç, banues në Lezhë, është përplasur me një motomjet që drejtohej nga Paulin Marku, 36 vjeç, banues në fshatin Barbulloj.
Përplasja ka rezultuar fatale për drejtuesin e motomjetit, i cili ka humbur jetën si pasojë e plagëve të marra.
Menjëherë pas aksidentit, në vendngjarje kanë mbërritur shërbimet e Policisë dhe grupi hetimor, të cilët kanë nisur veprimet për dokumentimin e plotë të ngjarjes dhe përcaktimin e shkaqeve të aksidentit.
Ndërkohë, drejtuesi i automjetit është shoqëruar në Komisariatin e Policisë së Lezhës për veprime të mëtejshme procedurale.
Hetimet vijojnë për zbardhjen e plotë të rrethanave të këtij aksidenti tragjik.
