Ish-mesfushori i njohur shqiptar, Gilman Lika, ka nisur një kapitull të ri në karrierën e tij si trajner. Ai është prezantuar zyrtarisht si pjesë e stafit teknik të Al-Jazira Club në Emiratet e Bashkuara Arabe.
Lajmin e bëri të ditur vetë Lika përmes një postimi në rrjetet sociale, ku shkroi: “Sezon i ri, skuadër e re, sfidë e re. Le të shkojmë Al-Jazira”, duke shënuar fillimin e këtij angazhimi të ri profesional.
Sipas të dhënave të “Transfermarkt”, Al-Jazira është një nga klubet më të rëndësishme në Emiratet e Bashkuara Arabe, me një vlerë tregu prej rreth 43 milionë eurosh dhe investime të konsiderueshme në merkaton e futbollistëve.
Gjatë karrierës si lojtar, Lika u dallua veçanërisht me fanellën e Vllaznisë dhe Tiranës. Me skuadrën shkodrane fitoi Kupën e Shqipërisë në sezonin 2007-2008, ndërsa me Tiranën ngriti katër trofe: dy kampionate dhe dy Kupa të Shqipërisë.
Pas tërheqjes nga futbolli aktiv, ai iu përkushtua trajningut. Hapat e parë i hodhi te Basania U15, ekip që arriti ta ngjiste në Superiore, ndërsa më pas vijoi punën në Akademinë Vllaznia, ku u shpall kampion me ekipin U17.
Prej disa vitesh Lika jeton dhe punon në Emiratet e Bashkuara Arabe së bashku me familjen e tij, ndërsa tashmë do të vazhdojë karrierën si trajner në radhët e Al-Jazira Club.
