Zëvendësministrja e Infrastrukturës dhe Energjisë, Edona Bilali, ka publikuar një reagim ku flet për atë që e quan “Sindroma e Hirushes” në politikën shqiptare, duke argumentuar se pritja që ndryshimi të vijë nga faktorë të jashtëm pengon zhvillimin e vendit.
Sipas Bilalit, demokracia nuk ndërtohet duke pritur “shpëtimtarë”, por përmes angazhimit të qytetarëve, forcimit të institucioneve dhe përgjegjësisë individuale. Ajo thekson se ndryshimet e qëndrueshme vijnë nga puna e përditshme dhe jo nga ndërhyrjet e jashtme.
Në reagimin e saj, zëvendësministrja kritikon përdorimin e gjuhëve të huaja në protesta dhe aktivitetet politike, si edhe takimet informale me përfaqësues ndërkombëtarë jashtë protokollit, duke i cilësuar këto si shenja të një mentaliteti varësie ndaj të huajve.
Bilali apelon që shqiptarët të ndërtojnë vetë të ardhmen e vendit, përmes dialogut, pjesëmarrjes aktive dhe besimit te institucionet, duke lënë pas, sipas saj, mentalitetin e pritjes që dikush tjetër do t’i zgjidhë problemet e Shqipërisë.
