Për të 24-ën ditë radhazi, qytetarë të mbledhur në Tiranë vijuan protestën e tyre para godinës së Kryeministrisë, duke përsëritur kërkesën për largimin e qeverisë aktuale dhe ngritjen e një qeverie teknike tranzitore.
Tubimi nisi në sheshin “Skënderbej”, ndërsa më pas protestuesit marshuan drejt Kryeministrisë, ku u lexuan kërkesat dhe u mbajtën fjalime. Mes thirrjeve kryesore ishte dorëheqja e kryeministrit dhe e kabinetit qeveritar, si edhe krijimi i një qeverie jopartiake me mandat njëvjeçar.
Organizatorët njoftuan gjithashtu se më 4 korrik protestës pritet t’i bashkohen edhe shqiptarë nga diaspora.
Në deklaratën e lexuar para Kryeministrisë, protestuesit kërkuan ndryshime kushtetuese dhe ligjore, përfshirë reformimin e Kodit Zgjedhor, ndryshime në financimin e partive politike, si dhe vendosjen e kufizimit të mandatit të kryeministrit në jo më shumë se dy mandate gjatë gjithë jetës politike.
Po ashtu, ata kërkuan shfuqizimin e disa ndryshimeve ligjore, mes tyre ato që lidhen me Zonat e Mbrojtura, Trashëgiminë Kulturore, “Paketën e Maleve” dhe statusin e Investimeve Strategjike.
Sipas protestuesve, pas realizimit të këtyre kërkesave synohet hartimi i një kontrate të re sociale mes qytetarëve dhe shtetit, përmes konsultimeve me ekspertë, intelektualë dhe përfaqësues të shoqërisë civile.
