Tre minuta i mjaftuan një personi të armatosur dhe të maskuar për të grabitur arkën e një banke të nivelit të dytë në zonën e Komunës së Parisit këtë të hënë paradite.
Sipas gazetares Dorjana Bezat, nga shqyrtimi i pamjeve të sigurisë të sekuestruara tashmë nga hetuesit, dyshohet se autori, ende i paidentifikuar, kishte njohuri të thelluara për ambientet dhe mënyrën e funksionimit të bankës.
Autori, që mbante një skafandër dhe ishte i armatosur me pistoletë, sapo hyri në bankë, kërcënoi rojen dhe e izoloj në pjesën fundore të ambienteve. Më pas kaloi banakun e arkës, ku arriti të mbledhë të gjitha paratë që gjeti në sirtarë. Sipas përfaqësuesve të bankës, shuma e grabitur arrin afro 60 mijë euro.
Pasi kreu grabitjen, i pashqetësuar dhe pa shkaktuar lëndime, ai u largua nga vendngjarja duke përdorur një monopatinë.
Për zbardhjen e rastit, Policia e Tiranës ka ngritur një grup të posaçëm hetimor dhe është duke punuar në disa pista për identifikimin dhe kapjen e autorit.