Deputetja e Shkodrës, Marjana Koçeku, ka reaguar përmes një postimi në rrjetet sociale, duke pretenduar se prej disa ditësh po përballet me sulme nga profile të rreme dhe persona që, sipas saj, i kërkojnë të dorëzojë mandatin.
Koçeku deklaron se largimi nga mandati do të ishte i lehtë për të, por thekson se nuk do t’i hapë rrugë asaj që e cilëson si presion të organizuar ndaj zërave kritikë.
“Kam zgjedhur pavarësinë e përfaqësimit në parlament dhe çmimi i të folurit lirshëm ka qenë i lartë”, shkruan deputetja, duke akuzuar funksionarë të shtetit për organizimin e një fushate denigruese përmes rrjeteve sociale.
Në reagimin e saj, Koçeku pretendon se ekzistojnë një numër i madh profilesh false që përdoren për presion online dhe se gjatë periudhave të protestave është shtuar, sipas saj, sulmi ndaj kritikëve të qeverisë.
“Kjo nuk duhet të jetë republika e falsitetit dhe e fantazmave online”, përfundon deputetja në reagimin e saj.
