Një 22-vjeçar shqiptar është dënuar me mbi pesë vite burg në Mbretërinë e Bashkuar për vepra penale të lidhura me trafikimin e lëndëve narkotike.
Edrilon Gjoni, 22 vjeç, banues në Doncaster, u dënua nga Gjykata e Kurorës në Cambridge me 5 vite e 3 muaj burg për posedim me qëllim shpërndarjen e drogës së klasit A (kokainë), si dhe me 2 vite burg për posedim të pasurisë me origjinë kriminale. Gjykata vendosi që dënimet të vuahen njëkohësisht.
Gjoni kishte pranuar fajësinë në një seancë të mëparshme.
Sipas policisë, më 24 maj 2025 ai u ndalua nga njësia Sentinel West në kufirin mes Suffolk dhe Cambridgeshire, pranë Newmarket, në aksin rrugor A142, ndërsa drejtonte një automjet tip Audi A5.
Pas kontrollit të kryer në bazë të ligjit për drogën, hetuesit gjetën prova në telefonin e tij celular që krijuan dyshime të forta për përfshirje në furnizimin me drogë të klasit A.
Më pas, gjatë kontrollit në një banesë në zonën e Cambridgeshire, policia sekuestroi mbi një kilogram kokainë, me një vlerë të vlerësuar në treg prej rreth 105 mijë paundësh, si dhe 6 mijë paund para në dorë.
Pas arrestimit, ai u akuzua zyrtarisht dhe u la në paraburgim deri në përfundim të procesit gjyqësor.
Rreshteri George Laflin nga njësia Sentinel West deklaroi se Gjoni ishte kthyer në një person të rëndësishëm në rrjetin e shpërndarjes së drogës së klasit A në zonat Suffolk dhe Cambridgeshire.
“Për shkak të provave dërrmuese të paraqitura në gjykatë, i pandehuri pranoi fajësinë në fazën më të hershme të procedurës,” tha ai.
