Seanca plenare e kësaj të enjteje, u shoqërua me një debat mes deputetes demokrate Greta Bardeli dhe ministrit të Infrastrukturës dhe Energjisë Enea Karakaçi, sa i takon projektit “Porta e Alpeve”.
“A rrezikon Shqipëria të mbetet me projekte të papërfunduara dhe me një borxh të madh publik?”, tha Bardeli, e cila ngriti dyshime sa i takon mungesës së transparencës nga ana e institucioneve mbi projektin dhe garancive reale.
Karakaçi u përgjigj duke thënë se po habitet nga ankesat e deputetes, që nuk i ka rënë telefonit për të adresuar shqetësimet e saj, ndërsa thekson se “Porta e Alpeve” nuk është politikë por një masë konkrete për qarkun e Shkodrës.
“Për shkak të cilësisë sime si ministër më bien në telefon shumë deputetë opozitarë që më pyesin për investime. Më bën përshtypje që qenke kaq shumë e shqetësuar dhe nuk sjell asnjë kërkesë, mund ta sillje kërkesën në ministri dhe do ju kisha dhënë të gjitha projektet që janë aty. Ju zonjë nuk e doni këtë projekt, nuk e doni zhvillimin prej 100 milionë eurosh për qarkun e Shkodrës dhe e përdorni vetëm për politikë. Kjo s’është politikë, kjo është masë konkrete për qarkun e Shkodrës dhe investimi për qarkun e Shkodrës. Nëse nuk jeni dakord s’ka problem, këto investime do vijnë. 100 milionë euro janë të angazhuara dhe përsa i përket pjesës së mbetur të 50 milionë eurove, po është i angazhuar financimi me KfW-në dhe jemi në hapat e miratimit të fazës pasardhëse.”, u përgjigj Karakaçi.
Pas fjalës së tij pati të tjera ndërhyrje në Kuvend, të cilave Karakaçi ju përgjigj: “Unë sugjeroj që ai që është dashamirës ndaj qarkut të Shkodrës dhe kjo është një paketë financimi për qarkun e Shkodrës, duhet ta miratojë atë! Nëse do një listë projektesh mund të jua referoj me shumë kënaqësi.”
