Gazetari Basir Çollaku pretendon se pajisjet akustike LRAD (Long Range Acoustic Device), të njohura si “topi akustik”, kanë mbërritur në aeroportin e Rinasit.
Përmes një statusi, Çollaku paralajmëron protestuesit për përdorimin e mundshëm të këtyre pajisjeve, duke u bërë thirrje të marrin masa për mbrojtjen e dëgjimit, përmes tapave për veshët dhe kufjeve që izolojnë zhurmat e forta.
Sipas gazetarit, pajisjet janë përdorur edhe gjatë protestave në Beograd dhe mund të kenë efekt në distanca deri në tre kilometra.
Çollaku pretendon gjithashtu se përdorimi i tyre bie ndesh me dokumentet ndërkombëtare dhe evropiane, duke e lidhur me praktikat e torturës.
Deri më tani, pretendimet për mbërritjen e pajisjeve në Rinas dhe përdorimin e tyre të mundshëm në protestat në Shqipëri kërkojnë konfirmim nga autoritetet përkatëse.
