Në Cërrik, këtë të hënë, qindra banorë u mblodhën për të protestuar kundër planit që parashikon bashkimin e Bashkisë së Cërrikut me atë të Elbasanit, si pjesë e reformës së re administrativo-territoriale.
Të pranishmit në protestë shprehën pakënaqësinë e tyre ndaj këtij propozimi, të cilin e konsiderojnë të dëmshëm për përfaqësimin e tyre, për cilësinë e shërbimeve publike si dhe për zhvillimin ekonomik dhe social të qytetit dhe zonës përreth.
Gjatë grumbullimit, qytetarët paralajmëruan se do të vazhdojnë dhe do të intensifikojnë protestat në rast se autoritetet përkatëse nuk i marrin në konsideratë kërkesat e tyre.
Qarku i Elbasanit, aktualisht i ndarë në shtatë bashki, sipas propozimit të Partisë Socialiste për hartimin e ri të hartës administrativo-territoriale, pritet të kalojë në vetëm katër bashki. Propozimi përfshin bashkimin e bashkive Prrenjas dhe Librazhd, si dhe të Belshit dhe Cërrikut me Bashkinë e Elbasanit.
