Agjencia e Mbikëqyrjes Policore (AMP) ka bërë të ditur se ka zbuluar prova të reja në lidhje me hetimin ndaj Ajdin Islamaj, një ish-specialist për Hetimin e Krimeve në Komisariatin e Policisë Sarandë.
Siç njofton AMP, në një pronë në emër të babait të tij, ku banon edhe Islamaj, është ndërtuar një kat shtesë mbi një ndërtesë ekzistuese dy-katëshe, dhe janë realizuar punime të tjera për ta transformuar objektin në një aktivitet hotelier.
Ekspertizën teknike e citojnë që konfirmon se bëhet fjalë për një ndërtim të ri, për të cilin kërkohej leje ndërtimi, por kontrolli nuk ka treguar se një leje e tillë është lëshuar ndonjëherë.
Hetimet kanë bërë të ditur se sipërfaqja e ndërtuar pa leje arrin të paktën 159 metra katrorë dhe aktualisht përdoret si hotel.
AMP-ja thekson se analizat e pamjeve satelitore tregojnë se ndërtimet janë realizuar gjatë vitit 2025, periudhë kur Ajdin Islamaj ishte duke ushtruar detyrën në atë zonë.
Masa e sigurisë për Islamaj është vendosur të jetë “Arrest në shtëpi”, ndërsa hetimet vazhdojnë për të dokumentuar plotësisht përgjegjësitë penale dhe për të identifikuar individë të tjerë që mund të kenë lidhje me këtë rast.
