Tre ditë pas vendimit të Erion Veliajt për ta larguar nga posti i kryetares së deleguar të Bashkisë së Tiranës, Anuela Ristani ka reaguar publikisht. Në një postim në rrjetet sociale, Ristani njoftoi tërheqjen e saj, duke theksuar se ka shërbyer për qytetin për më shumë se dhjetë vjet.
Gjatë deklaratës së saj, ish-nënkryetarja e Bashkisë shprehu falënderime për bashkëpunëtorët e saj ndër vite, duke theksuar: “Koha është gjykatësi më i drejtë, më i paanshëm dhe më i pakapshëm. Në respekt të kohës që do të vijë, lipset që qytetin ta shohim pak me tonin dhe ta duam për atë që jemi, jo për atë që mund të na bëjë.”
Të premten, Veliaj nga burgu i ndërpreu Ristanit mandatin në krye të Bashkisë së Tiranës, duke arsyetuar veprimin me faktin se ajo nuk kishte respektuar udhëzimet e tij.
Anuela Ristani ishte emëruar në këtë funksion që nga marsi i vitit 2025.
