Zjarrfikësit në Francë dhe Spanjë vazhdojnë të luftojnë flakët e fuqishme të zjarreve pyjore, të cilat kanë detyruar dhjetëra mijëra persona të braktisin banesat e tyre.
Të dyja shtetet po përgatiten gjithashtu për një tjetër valë të të nxehtit, e cila pritet të përkeqësojë më tej situatën duke filluar nga e mërkura.
Në Francë, forcat zjarrfikëse arritën gjatë natës të ndalonin avancimin e zjarrit afër qytetit të Bordosë.
Ndërkohë në Spanjë, autoritetet lejuan kthimin e banorëve në nëntë prej 11 qyteteve të evakuuara në provincën Toledo.
Pavarësisht kësaj, flakët vazhdojnë të shkatërrojnë zona të mëdha pa kontroll në rajonin e Madridit dhe në provincat fqinjë Avila dhe Toledo.
Një qytetar i evakuuar nga zjarret në Spanjë e përshkroi gjendjen si “një ferr të kuq”, duke shtuar se njerëzit u larguan me nxitim, me vetëm rrobat që kishin veshur, sipas Reuters.
Presidenti i Francës, Emmanuel Macron, deklaroi se vendi po përjeton situatën më të rëndë me zjarret pyjore që nga Lufta e Dytë Botërore.
“Po përballemi me një zjarr pyjor krejtësisht të paprecedentë”, u shpreh ai gjatë një vizite pranë Bordosë, ku u takua me ekipet e emergjencës.
Autoritetet franceze theksojnë se këtë vit është djegur një sipërfaqe më e madhe pyjesh se në të njëjtën periudhë të çdo viti që nga 2006-a.
Vala e të nxehtit rrezikon përkeqësim të situatës
Paralajmërime nga autoritetet franceze dhe spanjolle sugjerojnë se temperaturat ekstreme në ditët në vijim mund të vështirësojnë më shumë përpjekjet për shuarjen e zjarreve.
Në zonat bregdetare pranë Bordosë, kampet dhe komplekset turistike po evakuohen për arsye sigurie.
Spanja po përgatitet për të përballuar valën e katërt të të nxehtit gjatë kësaj vere.
Kushtet meteorologjike, përfshirë temperaturat e larta, erërat e forta dhe nivelin e ulët të lagështisë, pritet të amplifikojnë rrezikun e flakëve.
Sipas të dhënave nga autoritetet spanjolle, më shumë se 73.000 persona janë evakuuar, ndërsa rreth 66.000 të tjerë janë urdhëruar të qëndrojnë të mbyllur në shtëpitë e tyre për shkak të rrezikut.
Parashikuesit e motit presin që vala e të nxehtit të arrijë kulmin të mërkurën.
Temperaturat në Paris mund të arrijnë deri në 38 gradë Celsius, ndërsa në zonën e Madridit deri në 37 gradë.
Sipas shkencëtarëve, ndryshimet klimatike të shkaktuara nga aktivitetet njerëzore po e bëjnë valën e të nxehtit më të shpeshtë dhe më të fortë, duke krijuar kushte të favorshme për përhapjen e zjarreve pyjore.
