Një situatë e tensionuar u shënua në një fluturim të Ryanair, i cili operohej nga Malta Air, në udhëtimin nga Selaniku drejt Memmingenit në Gjermani.
Mediat e rajonit raportojnë se një problem në motor detyroi pilotët të bënin një ulje emergjente.
Pasagjerët treguan se, disa minuta pas ngritjes, një zhurmë e madhe u dëgjua, dhe një copë nga motori goditi një nga dritaret e avionit, duke e thyer atë.
Një pasagjer 61-vjeçar, i cili ndodhej ulur pranë dritares, u rrezikua të hidhej jashtë nga presioni i ajrit, por u mbajt nga pasagjerët e tjerë. Ai pësoi lëndime në qafë dhe djegie të lehta, ndërsa më pas ra në gjendje shoku.
Maskat e oksigjenit u aktivizuan automatikisht, dhe pilotët morën vendimin për t’u kthyer në aeroportin e Selanikut, ku avioni u ul me sukses. Katër pasagjerë u dërguan në spital për kontrolle të mëtejshme.
Autoritetet greke kanë nisur një hetim për të zbuluar shkaqet e problemit në motor, ndërkohë që Ryanair ofroi një avion tjetër për të transportuar pasagjerët drejt destinacioneve të tyre.
