Muaji qershor pritet të nisë me temperatura tipike vere, ndërsa vala e të nxehtit afrikan do të ndikojë ndjeshëm në vend edhe gjatë javëve të para të muajit.
Sipas sinoptikanes Lajda Porja, termometri do të shënojë vlera të larta, ndërsa moti do të karakterizohet nga ditë të nxehta, por edhe episode të shkurtra reshjesh në disa zona të vendit.
Sipas parashikimeve meteorologjike, fundi i majit ka sjellë masat e para të ajrit të nxehtë afrikan, të cilat do të vijojnë të dominojnë edhe në qershor. Temperaturat gjatë javës së parë pritet të luhaten nga 32 deri në 34 gradë Celsius, ndërsa pas datës 5 qershor do të ketë një tjetër rritje graduale.
Sinoptikania Lajda Porja bëri të ditur se termometri mund të arrijë deri në 35–36 gradë Celsius, duke e kthyer këtë muaj në një nga qershorët më të nxehtë të viteve të fundit. Megjithatë, moti nuk do të jetë plotësisht i qëndrueshëm.
Në disa zona të vendit parashikohen rrebeshe të shkurtra shiu, të cilat do të krijohen kryesisht gjatë orëve të pasdites si pasojë e temperaturave të larta dhe zhvillimit të shpejtë të vranësirave konvektive.
“Javën e parë të qershorit temperaturat do të jenë rreth 33–34 gradë. Pas datës 5 pritet një rritje graduale deri në 35–36 gradë. Këto masa të nxehta afrikane do të jenë të pranishme gjatë gjithë verës, me ndërprerje të shkurtra”, u shpreh sinoptikania.
Sipas saj, reshjet do të prekin kryesisht zonat malore dhe lindore të Shqipërisë, ndërsa bregdeti do të mbetet më i favorizuar nga moti i kthjellët dhe temperaturat e larta.
Ndër qytetet ku priten më shpesh zhvillime të tilla atmosferike janë Tirana, Kukësi, Puka, Bajram Curri, Peshkopia, Bulqiza, Korça, Pogradeci, Erseka, Tepelena dhe Gjirokastra. Reshje të izoluara mund të ketë herë pas here edhe në vijën bregdetare, por ato do të jenë të shkurtra dhe kalimtare.
