Prokuroria e Tiranës i është drejtuar Autoritetit Kombëtar të Ushqimit (AKU) me një shkresë zyrtare, duke kërkuar informacion të detajuar mbi veprimet dhe gjetjet e hetimit administrativ lidhur me rastin e dyshuar të helmimit të 56 studentëve në Akademinë e Policisë.
Sipas burimeve hetimore, ende nuk janë vënë në dispozicion të organit të akuzës të gjitha materialet zyrtare që duhet t’i ishin përcjellë AKU-së në kuadër të procedurës. Ky institucion kishte deklaruar më herët se shkak i incidentit dyshohej një produkt ushqimor, ndërsa më pas kishte njoftuar ndryshime në qëndrimin e tij pas verifikimeve të kryera.
Në kuadër të hetimit, Prokuroria ka sekuestruar 56 kartelat mjekësore të studentëve që shfaqën simptoma dhe u trajtuan në spital. Materialet janë dërguar për ekspertim në Institutin e Mjekësisë Ligjore, ndërsa janë marrë edhe dokumente të shërbimit spitalor për të ndihmuar në zbardhjen e rrethanave.
Hetuesit po ashtu po verifikojnë veprimet e AKU-së lidhur me kontrollin e mëparshëm dhe më pas pezullimin e aktivitetit të subjektit ushqimor “Sori Al”, i cili furnizonte ambientet përkatëse, si dhe vendimin për rikthimin e tij në funksion.
Sipas të dhënave të AKU-së, janë kryer analiza laboratorike të mostrave të marra në kuzhinat e Akademisë së Sigurisë dhe në Garnizonin e Forcave të Armatosura në Tiranë, të cilat kanë rezultuar brenda normave të lejuara të higjienës. Pas këtyre rezultateve, institucioni ka vendosur heqjen e bllokimit të aktivitetit të subjektit dhe ka kërkuar gjithashtu kryerjen e analizave të vetëkontrollit për produktet e gatshme, në përputhje me legjislacionin në fuqi.
