Edhe pa nisur sezoni veror, aksi Milot–Lezhë po jep sinjalin e parë të kolapsit rrugor, me radhë kilometrike dhe pritje që zgjasin më shumë se gjysmë ore për pak kilometra rrugë.
Deputeti i Partisë Demokratike, Gjin Gjoni, ka publikuar një video në rrjetet sociale ku denoncon gjendjen e trafikut në aksin rrugor Milot–Lezhë, ende pa nisur zyrtarisht sezoni veror.
Në videon e shpërndarë, Gjoni shprehet se qytetarët dhe vizitorët po përballen me pritje të gjata, veçanërisht në hyrje të qytetit të Lezhës, ku sipas tij për të përshkuar vetëm rreth 2 kilometra rrugë nevojiten mbi 30 minuta.
Ai e cilëson situatën “të papranueshme dhe skandaloze” për një zonë turistike që, sipas tij, çdo vit pret mijëra vizitorë, ndërsa thekson mungesën e zgjidhjeve dhe investimeve konkrete në infrastrukturë.
“Ende pa nisur sezoni veror, kjo është gjendja e trafikut në aksin Milot–Lezhë… Nëse kjo është gjendja sot, çfarë do të ndodhë në korrik dhe gusht?”, shprehet Gjoni në reagimin e tij.
Denoncimi i tij vjen në një moment kur fluksi i automjeteve në zonat bregdetare pritet të rritet ndjeshëm me afrimin e sezonit turistik.
