Një ngjarje e rëndë është regjistruar në orët e para të mëngjesit në Tiranë, ku një 17-vjeçar ka mbetur i plagosur me armë zjarri në rrethana që dyshohet të kenë qenë aksidentale.
Policia bëri me dije se njoftimi për ngjarjen e ndodhur në rrugën “Berit Beker” është marrë rreth orës 01:40.
Sipas të dhënave paraprake, incidenti ka ndodhur në banesën e shtetasit me iniciale R. S., 19 vjeç.
Nga veprimet e para hetimore rezulton se i riu dyshohet se ka shkrepur aksidentalisht armën e zjarrit tip pistoletë, duke menduar se ajo nuk kishte fishek në fole.
Për pasojë është plagosur shoku i tij, 17 vjeç, i cili u transportua menjëherë në spital.
Burime zyrtare bëjnë me dije se i mituri ndodhet nën kujdesin e mjekëve dhe po merr trajtimin e nevojshëm mjekësor.
Në përfundim të veprimeve të para hetimore, Policia ka arrestuar në flagrancë 19-vjeçarin R. S., ndaj të cilit rëndojnë akuzat për veprat penale “Plagosja e rëndë nga pakujdesia”, “Mbajtja pa leje e armëve dhe municionit luftarak” si dhe “Veprime që pengojnë zbulimin e së vërtetës”.
Po ashtu, janë arrestuar edhe dy shtetas të tjerë, A. V., 20 vjeç dhe H. H., 22 vjeç, të cilët dyshohen për veprën penale “Veprime që pengojnë zbulimin e së vërtetës”.
