Deputeti i Shkodrës, Kliti Hoti, ka reaguar pas votimit të djeshëm dhe deklaratave të deputetes Koçeku, duke theksuar se nuk mund të mbështesë “verbërisht” miliona euro borxh për projekte që, sipas tij, ende nuk kanë transparencë për kostot reale dhe mënyrën e zbatimit. Hoti deklaron se Shkodra ka parë prej vitesh “rendera 3D, propagandë me dron dhe premtime të mëdha”, ndërsa qytetarët vazhdojnë të përballen me projekte të zvarritura, standarde të dobëta dhe tendera që shpesh përfundojnë në SPAK.
Reagimi
Sa i përket votimit të djeshëm, dua t’i kujtoj deputetes Koçeku se rrugëtimi im profesional është ndërtuar mbi punë serioze, mbi projekte me preventivë të qartë dhe mbi përgjegjësi për mënyrën si përdoret paraja.
Prandaj nuk mund të dal e të duartrokas verbërisht miliona euro borxh për projekte ku ende nuk kemi qartësi të plotë për kostot reale, për mënyrën e zbatimit dhe për përgjegjësitë konkrete.
Sepse Shkodra i ka parë këto histori prej shumë vitesh.
Ka parë rendera 3D, propagandë me dron, prezantime të bukura dhe deklarata të mëdha, por ndërkohë qytetarët vazhdojnë të përballen me projekte që zvarriten, investime që nuk përfundojnë në kohë, standarde të dobëta dhe tendera që shpesh përfundojnë në SPAK.
Prandaj para se të kërkojnë moral politik apo duartrokitje, drejtuesit e Partisë Socialiste duhet t’u japin përgjigje qytetarëve të Shkodrës:
Ku kanë shkuar miliona euro të shpenzuara deri sot?
Pse shumica e projekteve zvarriten?
Pse Shkodra vazhdon me propagandë më shumë se me zhvillim real?
