Ministri i Infrastrukturës dhe Energjisë, Enea Karakaçi, ka zgjedhur rrjetet sociale për të propaganduar një investim në ujësjellësin e Elbasanit, por shifrat e bëra publike nga vetë ai në fakt zbulojnë dështimin e shtetit për të garantuar një të drejtë bazike.
Përmes një postimi, Karakaçi ka deklaruar me krenari se investimi i realizuar ofron sot furnizim me ujë të pijshëm pandërprerje për afro 60% të qytetit.
Çfarë fshihet pas “suksesit” 60%?
Ajo që ministri e sheh si arritje, në të vërtetë është një skandal për banorët. Duke thënë se 60% e qytetit ka ujë, Karakaçi pranon zyrtarisht se: 40% e banorëve të Elbasanit në vitin 2026 vuajnë ende mungesën e ujit të pijshëm pa ndërprerje. Pavarësisht miliona eurove të investuara ndër vite në këtë sektor, pothuajse gjysma e qytetit mbetet në mëshirë të skemave të vjetra me orare.
Ministri ka përmendur gjithashtu rehabilitimin e dy depove ekzistuese, ndërtimin e një depoje të re dhe vendosjen e sistemit #SCADA për monitorimin e rrjetit dhe stacioneve të pompimit. Mirëpo, pyetja që ngrihet është: Çfarë do të monitorojë ky sistem inteligjent nëse 40% e qytetit ende nuk ka ujë në çezma?
Në mbyllje të mesazhit të tij, Karakaçi ka ricikluar premtimin e radhës se do të vijojë projekti për të siguruar ujë për të gjithë banorët e bashkisë, duke e lidhur këtë edhe me “përmirësimin e performancës financiare të kompanisë”. Ndërkohë që qeveria mendon për balancat financiare të kompanisë, elbasanllinjtë në zonat e papërfshira do të vijojnë të blejnë ujë me bote apo të mbushin bidonat në burime publike.
