Një avion i kompanisë ajrore Qantas, i nisur nga Melbourne i Australisë drejt Dallasit, është detyruar të ndryshojë itinerarin pas një incidenti të pazakontë në bord.
Sipas mediave australiane, pak pas ngritjes në ajër, një pasagjer dyshohet se ka kafshuar një stjuardesë. Për shkak të situatës, avioni kreu një ndalesë të paplanifikuar në Papeete, kryeqyteti i Polinezisë Franceze.
Mediat lokale, përfshirë transmetuesin australian ABC Australia, raportojnë se burri u neutralizua nga pasagjerë të tjerë para uljes së avionit. Pas mbërritjes në Papeete, ai iu dorëzua autoriteteve lokale dhe u arrestua.
Pasi pasagjeri u largua nga avioni, fluturimi u furnizua me karburant dhe vazhdoi normalisht drejt Shteteve të Bashkuara.
Ndërkohë, kompania Qantas deklaroi se pasagjeri është ndaluar përgjithmonë nga të gjitha fluturimet e saj.
“Siguria e klientëve dhe stafit tonë është prioritet absolut dhe ne kemi tolerancë zero ndaj sjelljeve kërcënuese apo agresive në bord”, deklaroi një zëdhënës i kompanisë.
