Kalaja Rozafa vijon të mbetet një nga atraksionet turistike më të vizituara në veri të vendit dhe një prej pikave më të rëndësishme të trashëgimisë kulturore në Shqipëri.
Drejtori i DRTK Shkodër, Helidon Sokoli, bëri të ditur se vetëm gjatë muajit prill kalaja ka regjistruar mbi 17 mijë vizitorë vendas dhe të huaj, duke konfirmuar rritjen e interesit turistik për këtë monument historik.
Sipas Sokolit, fluksi i turistëve ka ardhur në rritje vitet e fundit, ndërsa Kalaja “Rozafa” mbetet një nga destinacionet më të preferuara për vizitorët që zgjedhin të eksplorojnë historinë dhe kulturën e Shkodër.
Ai theksoi gjithashtu se monumenti pritet t’i nënshtrohet së shpejti një projekti rijetëzimi, i cili synon përmirësimin e infrastrukturës dhe rritjen e standardeve për vizitorët.
Projekti pritet të ndikojë në promovimin e mëtejshëm të kalasë si një pikë kyçe e turizmit kulturor në vend, duke krijuar më shumë hapësira dhe mundësi për zhvillimin e aktiviteteve turistike dhe kulturore.
