Një situatë alarmante dhe tejet shqetësuese është regjistruar sot në spitalin rajonal të Shkodrës, ku asnjë ndërhyrje kirurgjikale nuk është kryer gjatë ditës. Shkak është bërë mungesa e funksionimit të gjeneratorit, duke lënë sallat e operacionit pa garanci minimale sigurie në rast të ndërprerjes së energjisë elektrike.
Burime bëjnë me dije se kirurgët kanë refuzuar të marrin përsipër kryerjen e operacioneve, duke mos pranuar të rrezikojnë jetën e pacientëve në kushte të pasigurta. Sipas të njëjtave burime, brenda institucionit është folur për një defekt në gjenerator, problem që ka sjellë bllokimin total të ndërhyrjeve kirurgjikale.
Ngjarja konsiderohet një skandal për sistemin shëndetësor në Shkodër, pasi dhjetëra pacientë kishin të planifikuara ndërhyrjet e tyre për ditën e sotme, por janë detyruar t’i shtyjnë për një afat të pacaktuar.
Pacientë dhe familjarë kanë shprehur indinjatë për situatën e krijuar nga papergjegjshmeria e drejtuesve të spitalit.
