Dy vëllezër me origjinë shqiptare, banues në Mestre të Italisë, janë arrestuar nga policia italiane pas një përplasjeje të dhunshme me armë dhe thika, ku shkak dyshohet të jetë bërë një grua e re me origjinë moldave.
Ngjarja ka ndodhur më 10 nëntor në Mogliano Veneto, në zonën e Via Italo Svevo, pranë një shkolle të mesme. Sipas mediave italiane, dy grupet me origjinë shqiptare ishin takuar për të “larë hesapet”, ndërsa situata degradoi në përdorimin e armëve të ftohta dhe armëve të zjarrit.
Të martën, më 12 maj, autoritetet italiane ekzekutuan dy masa sigurie ndaj një 31-vjeçari shqiptar, i cili u vendos në arrest shtëpie me byzylyk elektronik, si dhe ndaj një 22-vjeçari tjetër shqiptar, i cili u dërgua në paraburgim. Një person i tretë pritet të merret në pyetje nga gjykata për të përcaktuar masën ndaj tij.
Hetimet e Karabinierëve, të koordinuara nga Prokuroria e Trevisos, zbuluan se konflikti kishte lindur për motive personale të lidhura me një vajzë moldave.
Gjatë sherrit mbetën të plagosur disa persona. Më rëndë u dëmtua një 34-vjeçar i pastrehë, i cili u godit me thikë dhe më pas u arrestua për të shtënat me armë zjarri ndaj makinave të parkuara. Një tjetër 35-vjeçar nga Mestre u qëllua në gjoks, ndërsa një tjetër shqiptar 35-vjeçar pësoi plagë në gjymtyrë dhe në brinjë.
Të dyshuarit akuzohen për përleshje të rënduar, tentativë vrasjeje dhe posedim të paligjshëm armësh.
