Një vendim i Gjykatës së Shkallës së Parë në Shkodër është cilësuar si një fitore e rëndësishme për mbrojtjen e kafshëve në Shqipëri. Gjykata vendosi në favor të organizatës “Animals Need Me”, duke urdhëruar rihapjen e hetimeve për rastin e “Victorias”, qenushes që u gjet 9 muaj më parë e dhunuar brutalisht dhe e hedhur në një qese plehrash në zonën e Kirasit në Shkodër.
Sipas organizatës, pas shpëtimit të qenushes dhe ndjekjes së çështjes në rrugë ligjore, prokuroria kishte vendosur pushimin e hetimeve, por kjo u kundërshtua në gjykatë. Aktivistët theksojnë se personi përgjegjës për keqtrajtimin e kafshës vijon të jetë i lirë.
“Animals Need Me” falenderoi gjyqtaren për shqyrtimin me kujdes të dosjes, duke e konsideruar këtë vendim si një precedent pozitiv për drejtësinë ndaj kafshëve në vend.
Organizata shprehu gjithashtu mirënjohje për @anakinpetrescue, që sipas tyre ka bërë të mundur që “Victoria” të jetë tashmë në duar të sigurta.
