Ministrja e Shëndetësisë, Klodiana Spahiu, njoftoi se ndërhyrja kirurgjikale për Erjon Vishkullin, 28-vjeçarin nga Elbasani që u plagos në sy gjatë protestave studentore në Tiranë, është kryer me sukses në klinikën “Gemelli” të Romës.
Sipas deklaratës së Spahiut, operacioni u realizua nga profesori Stanislao Rizzo dhe rezultoi vendimtar për shpëtimin e syrit të Vishkullit. Megjithatë, procesi i rikuperimit do të jetë i zgjatur dhe specialistët do të monitorojnë nga afër gjendjen e tij shëndetësore.
Vishkulli u plagos në syrin e majtë pasi u godit nga një plumb gome gjatë protestave në kryeqytet. Pasi iu ofrua ndihmë fillestare në Shqipëri, për shkak të natyrës së ndërlikuar të dëmtimit ai u transferua në Itali për trajtim të avancuar mjekësor.
Me anë të një deklarate publike, ministrja Spahiu bëri të ditur se qeveria kishte aprovuar mbështetje financiare për shpenzimet e trajtimit të 28-vjeçarit. Ajo vlerësoi punën e stafit mjekësor në Romë dhe shprehu mirënjohje për përkushtimin dhe profesionalizmin e tyre.
“Erjon Vishkulli e ka kaluar me sukses ndërhyrjen kirurgjikale në klinikën ‘Gemelli’ në Romë, e cila e ka shpëtuar syrin e djalit”, shkruan Spahiu.
Gjithashtu, ministrja sqaroi se, në emrin e saj dhe të qeverisë shqiptare, i është drejtuar falënderime të veçanta profesor Stanislao Rizzos për suksesin e operacionit, duke nënvizuar se vendimi për ofrimin e ndihmës financiare ishte marrë në të njëjtën ditë.
“Përtej dijes dhe aftësisë profesionale, është pikërisht kjo anë njerëzore, bashkimi i forcave te humanizmi që i bën kaq të veçanta këto situata”, u shpreh ajo.
Në përmbyllje të deklaratës së saj, Spahiu i dëshiroi të riut një shërim të shpejtë dhe qëndresë në fazat që e presin gjatë rikuperimit.
“Erjonit i uroj nga zemra shërim të mbarë dhe forcë në çdo hap të mëtejshëm. Suksesi i ndërhyrjes është një lajm i mirë, ndërsa rrugëtimi drejt rikthimit të dritës së syrit do të vijojë me durim e besim”, përfundoi ministrja, duke vënë në dukje mirënjohjen për mjekun italian dhe duke uruar familjen dhe miqtë e të riut.
