Me shfaqjen e komedisë “Fshati ku të vjedhin burrin” në oborrin e Muzeut Historik të Shkodrës, u finalizua edicioni i dytë i festivalit teatror “Gjegju Fest”. Interpretimi i kësaj vepre i qëndroi besnik traditës së komedisë popullore, ku në qendër të skenës u vendosën maskat, gjuha e trupit dhe gjestet, të cilat luajtën një rol thelbësor në përcjelljen e humorit.
Regjisori dhe autori i tekstit, Armand Bora, vuri në dukje se shfaqja i përket teatrit të maskave, një zhanër ku komunikimi joverbal dhe veprimi skenik marrin përparësi, duke e kthyer trupin dhe shprehjen fizike në bazë të artit interpretues.
Gerti Palali, drejtues i teatrit “Migjeni”, theksoi se krijimi i hapësirave të reja për artistët e rinj dhe angazhimi i tyre në jetën kulturore të qytetit mbetet një synim i rëndësishëm. Ai nënvizhoi vlerën që kanë festivale të tilla për promovimin e talenteve të reja dhe për zhvillimin e krijimtarisë breznore.
Gjatë gjashtë netëve të festivalit “Gjegju Fest”, publiku i Shkodrës ndoqi gjashtë shfaqje të ndryshme teatrale, të cilat u vendosën fillimisht në skenën e teatrit “Migjeni” dhe, në mbyllje, në hapësirat e Muzeut Historik të Shkodrës. Ky edicion i dytë solli interpretime të shumëllojshme dhe forma të reja skenike, duke hapur një tjetër mundësi për bashkëpunim dhe kontakt mes artistëve dhe artdashësve të qytetit.
