Organizata Botërore e Shëndetësisë nuk pret një përhapje të madhe të virusit Shamonda, pasi një burrë në Francë humbi jetën, në rastin e parë të konfirmuar ku ky virus ka infektuar një njeri.
Christian Lindmeier, zëdhënës i OBSH-së, deklaroi se të dhënat aktuale dhe përvoja me viruse të ngjashme tregojnë për një incident të veçuar. Megjithatë, deri në këtë moment, organizata nuk ka hartuar një vlerësim zyrtar të rrezikut.
Ministria Franceze e Bujqësisë njoftoi se viktima ka ndërruar jetë në fillim të tetorit. Ai kishte një imunodefiçencë të theksuar, çka dobëson në mënyrë të konsiderueshme aftësinë mbrojtëse të trupit kundër infeksioneve.
Martin Beer, specialist në Institutin “Friedrich Loeffler” në Gjermani, sqaroi se një sistem imunitar i komprometuar mund të lejojë që infeksioni viral të shfaqet dhe të përhapet më lehtë në trupin e njeriut.
Derisa tani, Shamonda ishte konstatuar vetëm te gjedhët dhe kuajt. Dyshohet se burri nga lindja e Francës është infektuar nga pickimi i një insekti të vogël. Në të njëjtën zonë, më herët gjatë këtij viti, ishin raportuar infeksione te kafshët.
OBSH vëren se transmetimi i këtyre viruseve nga insektet tenton të bjerë në muajt e ftohtë. Instituti “Friedrich Loeffler” shton se insektet përhapëse janë të zakonshme në Evropën Qendrore dhe kryesisht veprojnë nga prilli deri në nëntor.
Ky virus është zbuluar edhe te kafshët në vende të tjera të Evropës, përfshirë Gjermaninë, Austrinë, Zvicrën, Belgjikën, Holandën, Spanjën dhe Italinë.
Në rrethanat aktuale, pavarësisht pranisë së virusit te kafshët, OBSH thekson se nuk ka të dhëna që të tregojnë një përhapje të gjerë te njerëzit. Detajet mbi ngjarjen në Francë dhe vlerësimi përfundimtar i rrezikut ende nuk janë sqaruar plotësisht.
