Tubimi përpara Kryeministrisë po tërheq një numër në rritje qytetarësh, ndërsa deri tani situata ka mbetur e qetë, pa shënuar incidente apo përplasje me forcat e rendit. Sipas gazetarit Renaldo Salanji, një kordon policie është pozicionuar përballë godinës qeveritare.
Ndërkohë, përgatitjet për protestën kombëtare të paralajmëruar nga studentët për nesër në Tiranë po vijojnë intensivisht. Raportimet tregojnë se kësaj nisme iu janë bashkuar edhe pedagogë, mjekë dhe sindikata e biznesit të vogël.
Pedagogët kanë planifikuar të grumbullohen pranë Universitetit Politeknik në orën 10:00. Partia Demokratike u ka kërkuar anëtarëve të forumeve dhe aktivistëve të saj të marrin pjesë në protestën e studentëve në orën 12:00, ndërsa në orën 14:00 është bërë thirrje për bashkimin e grupeve studentore përpara Kryeministrisë.
Studentë nga qytete të tjera kanë shprehur gjithashtu mbështetjen e tyre dhe pritet t’i bashkohen protestës në Tiranë. Gjatë kësaj jave, organizime të ngjashme janë mbajtur edhe në qytete të tjera universitare, ndërsa nesër pritet që studentët të udhëtojnë drejt kryeqytetit për të marrë pjesë në tubimin e paralajmëruar.
