Persekutimi gjatë regjimit komunist nuk u ndal vetëm te burgosjet dhe dënimet politike. Sipas studiuesit Pjerin Mirdita, shumë intelektualë të përndjekur u privuan edhe nga një pjesë e rëndësishme e punës së tyre krijuese dhe shkencore.
Drejtuesi i Muzeut të Dëshmisë dhe Kujtesës në Shkodër tregon se shkrime, dorëshkrime dhe studime të përgatitura prej tyre u morën gjatë diktaturës. Disa prej këtyre materialeve janë zhdukur, ndërsa për të tjera ekzistojnë dyshime se janë përdorur nga persona të tjerë pa u njohur autorësia e vërtetë.
Sipas Mirditës, ka pasur raste kur punimet e intelektualëve të persekutuar janë shfrytëzuar nga të tjerë për të marrë grada shkencore dhe për të ndërtuar karrierën akademike, ndërsa autorët e tyre të vërtetë përballeshin me pasojat e diktaturës.
Kjo dëshmi rikthen vëmendjen te një tjetër plagë e regjimit komunist: përveç lirisë dhe të drejtave themelore, intelektualëve të përndjekur iu mohua edhe njohja e meritës për punën dhe kontributin e tyre shkencor.
